Converxencia XXI considera que o goberno Rajoy ten emprendido a errónea política de subas impositivas –incumprindo todas as súas promesas electorais- e que só van contribuír a agravar aínda mais a profunda crise económica que padecemos. Ademais, ao goberno do Partido Popular só se lle ocorre como xeito de controlar o gasto público prexudicar aos cidadáns, reducindo o investimento público e encarecendo os servizos públicos, mentres os intereses dos grupos próximos ao poder permanecen intactos. Ante este despropósito do goberno conservador, desde Converxencia XXI queremos ofrecerlle ao Sr. Rajoy e o seu goberno catorce políticas que si colocarían á economía española na senda da recuperación, o crecemento e a creación de emprego, ao tempo que permitirían controlar o déficit público sen que os contribuíntes saísen sistematicamente prexudicados.

 As políticas:

1. Reducir o número de cargos políticos nas administracións españolas nun número arredor dos 500.000 para situarnos nunha cifra por habitante próxima a Alemaña e outros países do norte de Europa, levando a cabo as reformas institucionais precisas –especialmente da administración local- e co obxectivo de reducir o gasto público e poñer couto á corrupción que asola a economía española. Esta redución de cargos políticos permitiría reducir o gasto público nunha cifra superior ao 1% do PIB español.

2. Eliminar os subsidios a empresas e sectores económicos (enerxético, agropecuario, carbón,…) aos partidos políticos, aos chamados axentes sociais (patronal e sindicatos) e aos medios de comunicación. Os subsidios a diversos tipos de axentes –xerme de ineficiencias e corrupción- representan mais do 1% do PIB español.

3. Reducir as cotizacións sociais a un 18% do salario bruto do traballador co fin abaratar os custos laborais sen que esta diminución repercuta negativamente no poder adquisitivo do asalariado.

4. Introducir unha taxa impositiva única do 25% sobre a renda –tanto procedente do traballo como do capital- cun mínimo exento de 15.000 euros anuais. O mínimo exento convertería o imposto en progresivo e permitiría que quen cobrase por debaixo dos mil euros ao mes non tivese que pagar o imposto sobre a renda.

5. Reducir o imposto de sociedades ao 10% dos lucros anuais da empresa para así favorecer o investimento produtivo e a entrada de capital estranxeiro.

6. Elaborar un plan para perseguir o fraude fiscal co obxectivo de aumentar a recadación fiscal e acabar coa inxustiza de que o peso do fisco sexa soportado polo asalariados.

7. Eliminar todos os privilexios fiscais (deducións, desgravacións,…) que confunden, complican, favorecen o fraude, discriminan e, en definitiva, fan inxusto o noso sistema fiscal e que especialmente afectan ao imposto sobre a renda e ao imposto de sociedades.

8. Eliminar a distinción entre despedimento procedente e improcedente para acabar coa lacra da xudicialización que corroe as nosas relacións laborais e aumenta ostensiblemente os custos laborais.

9. Substituír as indemnizacións por despedimento por unha contribución empresarial mensual -do 1,5% do salario bruto do traballador- a un fondo de capitalización individual ao que o traballador teña acceso independentemente de se é despedido ou abandona voluntariamente o seu emprego, que conserve aínda cando mude voluntariamente de emprego e que poda acumular para a súa xubilación.

10. Instaurar procedementos públicos, limpos e transparentes na adxudicación de contratos públicos para que sexan as empresas que fan ben o seu traballo as que reciban os encargos e non os empresarios que medran á sombra do poder.

11. Reducir nun 80% o número de empresas, entes e organismos públicos que frecuentemente proporcionan deficientes servizos aos cidadáns, acumulan perdas millonarias –incrementando o endebedamento público- e serven para colocar e premiar aos amigos do poder.

12. Reforma educativa, sanitaria e das pensións que permita que os servizos sociais sexan solventes e sustentábeis a medio e longo prazo, incorporando decididamente a iniciativa privada no fornecemento dos mesmos e garantindo o acceso de todos.

13. Renunciar a socializar as perdas dos bancos –principalmente das caixas, entidades financeiras controladas polo poder político- e iniciar inmediatamente un proceso de liquidación controlada de todas as entidades financeiras insolventes garantindo os intereses dos depositantes. Os custos da salvataxe bancaria que este goberno conservador –e previamente o goberno socialista- pretende aínda é incerto, mais podería superar o 10% do PIB español.

14. Reorganización do Estado Autonómico para afondar nos principios do Federalismo Fiscal de xeito que as administración públicas, en todos os seus niveis, sexan responsábeis tanto dos seus ingresos como dos seus gastos e se eviten duplicidades administrativas, instaurando así os incentivos necesarios para a xestión eficiente e o aforro e non para o esbanxamento e os comportamentos free rider.

Todas estas políticas son de relativamente doada implementación. Só é precisa a vontade política para levalas adiante e non estar atrapado nas redes dos grupos de interese que están permanentemente condicionando ao seu favor as políticas públicas. Temos fundadas razóns para acreditar en que o actual goberno conservador –como o anterior socialista- non fará absolutamente nada disto e tirará polo camiño das subas impositivas acompañadas de peores servizos públicos. A súa prioridade non é o benestar dos cidadáns, mais si a salvagarda dos seus intereses e os dos seus amigos.

O pasado 5 de maio tivo lugar a celebración do Día do Partido por parte de Converxencia XXI, conmemorando o 3º aniversario da formación liberal galega.

A celebración consistiu nun xantar de confraternización entre afiliados que serviu para mellorar aínda máis as ligazóns entre a familia liberal galega.

Para ver as imaxes do evento preme na seguinte ligazón:
- Día do partido 2012

O xantar terá lugar no RESTAURANTE PARRILLADA SAN MARTIÑO – Lugar de Espiño, CP: 15866 Calo, Teo (Santiago de Compostela) -.

O prezo do xantar será de 22 € por persoa.

Animamos a todas aquelas persoas interesadas en coñecer o proxecto de Converxencia XXI a que se acheguen a partillar uns momentos distendidos moi gratificantes.

Para apuntarse ó evento, hai que comunicalo na dirección caixadecorreo@converxencia.eu á maior brevidade posíbel.

- Como chegar?
O Restaurante-Parrillada San Martiño sitúase na estrada que une o Milladoiro e Padrón (fica sinalizado cun cartel enorme), máis preto do Milladoiro.
Desde o sur: Os que veñan pola AP9, desde o sur, deben sair en Padrón e, unha vez cruzada a vila, seguir pola estrada vella en dirección Santiago de Compostela.
Desde o norte: Os que veñan desde o norte, han de sair no Milladoiro e coller a estrada dirección Padrón.

- 2º exemplar da Revista Chorima - parte 1/3

- 2º exemplar da Revista Chorima – parte 2/3

- 2º exemplar da Revista Chorima – parte 3/3

- Manifesto Liberal de Oxford (1947)

A Asamblea decidiu nomear coma novo Secretario Local a Mateo Santiago Franco e un novo Comité Executivo Local formado por Raúl Barca, Xosé Luis Reza e Mateo Santiago Franco. Así mesmo, a Asamblea trazou as liñas mestras básicas que debe seguir a política da Agrupación Local e do Comité Executivo durante o novo periodo na cidade herculina.

O pasado sábado 24 de marzo, os partidos galeguistas de centro xutámonos co obxectivo de constituir un foro aberto de diálogo en prol dunha suma de forzas que permitan estreitar ligazóns entre os diferentes proxectos.

Na primeira xuntanza, estando presentes: Henrique Carvalho Rodrigues (Alternativa Popular Galega) – Carlos Vázquez Padín (Converxencia XXI) – Alfredo Bea e Xaime da Pena (Partido Galeguista Demócrata) – Rosendo Covelo (Partido Nacionalista Galego-Partido Galeguista) – Guillermo Sánchez Fojo (Terra Galega), acordáronse os seguintes puntos:

1º Os partidos do galeguismo de centro cremos que Galicia precisa un compromiso redobrado nestes momentos difíciles. O noso Pais esixe un novo pulo nestes tempos de crise, tanto económica como de identidade.

2º Galicia debe ser a prioridade da política e dos políticos galegos. É a política a que ten que estar ao servizo dos cidadáns e non ao revés.

3º E por iso, comezamos un proceso de diálogo entre nós que permita traballar decidida e definitivamente na confluencia política e organizativa dos nosos partidos.

4º Un proceso aberto a aqueles cidadáns e organizacións que teñan a Galicia como prioridade e o centro como espazo político de referencia.

Eis o manifesto en prol da unión do galeguismo de centro:
- Comunicado conxunto por parte dos partidos galeguistas de centro -

Entrevista a Carlos V Padín en Radio Voz 21/03/2012

O Secretário Xeral de Converxencia XXI lembrou que o modelo marxista que representan paises como Cuba ou Venezuela é un camiño equivocado e nunca se debe ter coma un referente para Galicia.

Tamén manifestou que o PP “xa nin sequera defende o galeguismo folclórico” ademáis da súa “constante deriva intervencionista e clientelista que o alonxan cada vez máis do liberalismo”.

Entrevista:

Entrevista a Carlos V Padín en Onda Cero Galicia 21/03/2012

A delegación convidada de Converxencia XXI no congreso do PNG-PG, composta polo Secretario Xeral, Carlos Vázquez Padín e polo Secretario de Finanzas, Antonio Pérez, reiterou, porque xa lla tiña manifestado desde hai meses, aos anfitrións, e ás delegacións e persoas convidadas ao Congreso, a boa disposición para o diálogo e o encontro do noso partido. Converxencia XXI, partido que se define como galeguista e de centro liberal, non debe permanecer alleo a este verdadeiro big bang organizativo que afecta a organizacións e persoas que nalgún caso, concretamente no do PNG-PG, están perto das nosas coordenadas de pensamento.

Se C.XXI foi fundado no 2009 é precisamente porque non criamos no esquerdismo como plantexamento de progreso para os galegos e para este País, nen no frentismo como modelo organizativo, ademáis de considerar que o liberalismo é unha corrente de pensamento absolutamente crucial para incorporar a Galicia ao conxunto dos paises máis avanzados do mundo no século XXI. Todo isto fai completamente redundante e innecesario afirmar que o noso lugar non está nunha organización de esquerdas.

C.XXI está disposta a ser xenerosa se o que se quere é contribuir a que o proceso que se está producindo desemboque nunha oferta política homologable, por exemplo e salvando as distancias, á que en Cataluña representa CiU, pola contra non sería honrado nen coherente estar ou contribuir a un proceso que dese como resultado unha bifurcación do tipo Batasuna-Aralar ou ERC-Reagrupament. É dicir, nun proceso de escisión que dese como resultado a existencia de dous partidos que na prática defendan modelos políticos idénticos ou moi próximos limitándose a fagocitar o voto da esquerda, isto non aportaría nengúnha máisvalia ao País e consolidaría o dominio do PP no centro e na dereita.

A dirección de C.XXI quere manifestar a sua receptividade e boa disposición a falar con todos aqueles que queiran traballar para a confluencia do galeguismo/nacionalismo cercano a posturas centradas. Encontrarásenos sempre en calquera iniciativa que persiga rachar o monopolio marxista, que desde a transición, domina o galeguismo político através de duas correntes destacadas, a comunista, representada pola UPG e a socialista, representada no seu dia polo PSG e cuxa versión actualizada poderíase considerar que representan algún dos partidos que están saindo do BNG.

Na nosa opinión e cos bimbios existentes podese traballar para a configuración dun proxecto de amplo espectro dentro do centro, no que poida haber socialdemócratas, liberais e democratacristáns, o obxectivo seria obter como resultado unha organización que se ubique á dereita do PSOE e á esquerda do PP, buscando unha síntese programática entorno ao liberalismo social, á marxe de etiquetas, e a un galeguismo atractivo, aberto e integrador, tamén somos partidarios de que o partido resultante dun hipotético proceso negociador se integrase no Partido Liberal Demócrata Europeo, onde están integrados partidos de nacións sen estado, como Convergencia Democrática de Catalunya, ou partidos social-liberais de estados-nación como o holandés D66 ou os Lid-dems británicos.

Ademáis dos sectores “non marxistas” que están saindo do BNG, ese novo proxecto debería contar cos partidos que están xa actualmente posicionados no centro galeguista, entre os que poderíamos mencionar ao PG, PGD, CG e TEGA, todos eles saben da nosa boa disposición, tamén habería que tratar de atraer a membros liberais e/ou galeguistas do Partido Popular, desencantados coa deriva centralista e intervencionista do seu partido.